Се прашувате што има во плакарот на модна ентузијастка која може да си дозволи дизајнерски креации со енормни цени? Сиднеј Холанд ги отвори вратите на својот дом за Coveteur и го даде одговорот.
Многу винтиџ креации, сакоа од Шанел, фустани и модни додатоци од Гучи и колекција од 28 Биркин чанти во различни бои.
„Кој не сака Биркин? Започнав да собирам Ермес пред веројатно 10 години. Ја обожавам чантата Кели, а ја сакам целата приказна околу Џејн Биркин и Париз“ - вели таа.
Освен што има страст за мода, Холанд е колекционерка на уметнички дела, па низ нејзината куќа во Беверли Хилс можат да се видат многу слики на познати уметници. „Јас сум обожавателка на уметност и сакам уметници. Ако треба да избирам со кого да поминам повеќе време, ќе изберам уметник или дизајнер, затоа што креативноста и начинот на којшто го гледаат светот, според мене, е многу специјален“ - изјавила таа.
