Елизабета Ѓоргиевска моментално престојува во Дубаи по повод Павилјонот за жени ЕКСПО 2020, во чии рамки ќе се обрати на панел дискусијата „Визии и патувања“.
Македонската прва дама оствари средба со Охуд Калфан Ал Руми, државна министерка за владин развој и иновации на Обединетите Арапски Емирати.
„Посветено инвестирање во развој, иновации, нови политики и пристапи на работа, ќе ни помогнат наместо да ја пречекаме, да ја креираме нашата иднина во денешниот глобализиран свет. Денеска во Дубаи имав одличен разговор со г-ѓа Охуд Калфан ал Руми. На средбата разговаравме и за врските помеѓу нашите општества кои се создаваат преку институционалната соработка, како и преку нашите сограѓани кои живеат и работат во Обединетите Арапски Емирати“ – пишува на официјалните профили на Ѓоргиевска.
Ѓоргиевска оствари и средба и со Омар Султан Ал Олама, државен министер за вештачка интелигенција.
„На мојата средба со министерот за вештачка интелигенција на Обединетите Арапски Емирати, Омар Султан Ал Олама разговаравме за најновите проекти од областа на вештачката интелигенција и нејзината важност за иднината.“
„Со забрзување на дигитализацијата на индустријата и економијата се овозможуваат големи придобивки за луѓето, меѓу кои и поедноставениот пристап до електронските услуги“ – напиша Елизабета.
За оваа пригода, Елизабета изгледаше беспрекорно елегантно во црвена комбинација.
