Софија Вебстер ги отвори вратите на својот дом и им дозволи на фановите да ѕирнат како изгледа нејзиниот плакар. Популарната дизајнерка покажа колку многу обувки поседува и се фотографираше со малата ќерка Биби.
Забавните колекции на Вебстер се препознатливи по откачените тематики и колоритниот микс. Откако се усоврши покрај ексцентричниот Николас Кирквуд, младата Британка инстантно се проби до врвот на модната индустрија. Дизајнерскиот процес на Вебстер започнува во нејзината глава, но при првата укажана прилика, таа ги пренесува идеите на хартија. „Цртањето апсолутно ми е омилена активност и сум многу брза, а тоа помага многу“ – изјавила таа во интервју за The Coveteur.
Од далеку се гледа дека Вебстер обожава ведри бои. Во нејзиниот плакар може да се забележат многу модни парчиња во боја на фламинго.
Од славните дами, Софија вели дека најмногу би сакала нејзините креации да ги види на стапалата на Гвен Стефани. „Би сакала да ја видам Гвен Стефани во моите обувки“ – признала таа.
Вебстер сега има и линија обувки за деца. „Порано рачно изработував детски обувки кога моите пријатели ќе добиеја бебиња. Потоа, кога забременив, одлучив да ја лансирам линијата Sophia Webster Mini“ – објаснила таа.
