Градот на конзулите е обвиен со филмска магија. Под мотото „Прекрасното непознато“, официјално започна 44-тото издание на Интернационалниот фестивал на филмската камера „Браќа Манаки“ и привлече голем број на филмомани.
На синоќешното свечено отворање, присуствуваа многу домашни и странски гости кои дефилираа на црвениот тепих пред Центарот на културата во Битола.
Директорот на фестивалот Симеон Мони Дамевски, градоначалникот на Битола Тони Коњановски, министерката за култура Бисера Костадиновска Стојчевска, како и редица актери, филмски работници и почитувачи на филмската уметност ја продолжија традицијата да се слави творештвото на „браќата на светлината“, Јанаки и Милтон Манаки.
Најстариот фестивал на филмската камера во светот започна со премиерата на „Домаќинство за почетници“, по сценарио и во режија на Горан Столевски. Филмот се занимава со универзалните вредности на семејството – она во кое сме се родиле и она кое самите сме го избрале. Приказната следи битка помеѓу три своеглави жени кои полека прераснуваат во семејство и ќе сторат сѐ за да останат заедно.
Главните улоги ги толкуваат: Анамариа Маринка и Алина Сербан од Романија, Самсон Селим, Миа Мустафа и Џада Селим од Македонија и Владимир Тинтор од Хрватска. Во споредните улоги се Сара Климоска и Ајше Усеини од Македонија и Розафа Челај од Косово.
За време на манифестацијата, на публиката ѝ се обрати директорот Дамевски со зборовите:
Создавањето на еден филм, на едно уметничко дело, па и на Фестивал, секогаш започнува со скок во непознатото. Возбудлив, но и застрашувачки. За среќа, тој скок во непознатото најчесто резултира со едно прекрасно патување и завршува со резултат што им носи големо задоволство и на публиката и на создавачите на филмот. Затоа одново и одново скокаме во непознатото. Ова Прекрасно непознато ќе ви биде во Битола седум фестивалски денови.
Фестивалот ќе биде затворен на 29 септември со македонскиот филм „Лена и Владимир“ на Игор Алексов.
Погледнете фотографии од црвениот тепих:
Фото: Ивона Кочов / Femina.mk
