Мало слонче и неговата мајка биле спасени во Замбија, Јужна Африка, откако група луѓе ги извлекле од жива кал.
Работниците од друштвото за заштита на природата „South Luangwa Conservation Society“ во нормални услови не преземаат ништо кога има некој проблем со животните, освен во случаите кога проблемот настанал поради човечка вмешаност. Но, овој пат решиле дека не можат да стојат настрана и да гледаат како слончето и неговата мајка бавно умираат во калта.
„Повеќето заштитници на природата веруваат дека човекот не треба да го менува природниот тек и дека треба да се остави природата да си го направи своето, колку и да е тоа сурово и безжалосно. Ние се согласуваме, освен ако проблемот не е создаден од човек (на пример, ако животното е заглавено во ограда, тогаш интервенираме)... Но, секое правило има свој исклучок и ужасната положба на бебето слон заглавено во калта и неговата мајка, која се заглави обидувајќи се да го спаси, нè натера сите да се активираме. Едноставно не можевме да стоиме и да ги гледаме како се борат и умираат бавно“ – изјавила Рејчел МекРоб за Daily Mail.
Со помош на јаже работниците успеале да го извлечат прво малото слонче, а потоа со трактор ја извлекле и неговата мајка.
Приказната со среќен крај разнежни бројни срца од цел свет.
