На 9 ноември Берлин ја прослави 30-годишнината од падот на Берлинскиот ѕид, кој 28 години и еден ден беше симбол на Студената војна и Железната завеса. Падот се случи ненадејно во 1989 година и тоа беше првиот чекор кон повторно обединување на Германија.
Највпечатливиот дел од овогодишната прослава беше уметничката инсталација со 120.000 ленти наречена „Visions in Motion“ пред Бранденбуршката порта.
Инсталацијата долга три километри беше еден вид симбол на единството на германскиот народ, а е дело на Poetic Kinetics. На една четвртина од лентите беа испишани пораки со честитки, желби и надежи не само од Германци, туку и од лица од целиот свет.
