Лондонскиот аеродром „Хитроу“ ја објави новата божиќна реклама. Ѕвезди на рекламата се неодоливите мечиња Дорис и Едвард, кои ги запознавме минатата година, но овој пат приказната е сосем поинаква.
Во рекламата ретроспективно ги гледаме емотивните средби на мечињата на аеродром, секоја година за Божиќ. Видеото го прикажува моментот на запознавање, кога Едвард бил патник, а Дорис стјуардеса, потоа ја следи нивната љубовна приказна и постепеното проширување на нивното слатко семејство.
На крајот, Едвард носталгично гледа фотографија од себе и од Дорис додека патува со авион. Штом пристигнува на аеродромот и кон неговите раширени раце притрчуваат Дорис и нивните деца и внуци, слатките мечиња се претвораат во луѓе.
Идејата е да се потенцира дека за време на празниците, секој посакува да биде во прегратката на своите најсакани.
