Додека едни парови успеваат брзо да зачнат и да се радуваат на нов член на семејството, постојат партнери кои со години се борат со неплодност и даваат сè од себе за да можат да видат две цртички на тестот за бременост.
Блогерката Дезире Фортин, која долго време копнееше да стане мајка, ја покажа насобраната кожа на стомакот по раѓањето на тројка заедно со искрена порака. На фотографијата, таа држи табла на која пишува: „За секоја жена која е несреќна со трагите од бременоста постои друга жена која копнее да ги има“.
Прочитајте ја пораката со која Фортин цели да ги потсети мајките дека нивното тело е неверојатно и има моќ да создаде нов живот:
Еднаш јас бев таа, жената која чека, посакува и се надева дека ќе стане МАЈКА. Најневеројатното чувство ми беше она кога дознав дека ќе станам мајка. Не беше важно дали ќе се породам природно или со царски рез (сите ние сме рок ѕвезди). И не беше важно дали телото драстично ќе ми се промени. Јас конечно стигнав до моментот да станам мајка, мајка на тројка! И иако никогаш не замислував дека телото ќе ми изгледа вака како што ми изгледа денес, тоа претставува многу повеќе. Има вишок кожа, стрии и брчки. Додека понекогаш ми е тешко да го сакам моето мајчинско тело, постои новата јас која ја претставува моќта на женското тело и чудото да носи три бебиња.
Трагите по бременоста ги нарекувам „Рани на надежта“, тие ме научија да се сакам себеси и да го почитувам моето тело. Нашите траги од бременоста се приказни за надеж, приказни за љубов и понекогаш приказни за загуба. Нашите мајчински тела се убави бидејќи пред сè, тие претставуваат живот, ги претставуваат нашите деца и бескрајната љубов која ја чувствуваме за нив.
До оние жени кои копнеат, се надеваат и се молат за нивното чудо: Посакувам да имате надеж во вашето патување и константен потсетник дека не сте сами. До сите мајки кои се борат да се засакаат себеси: Вие сте убави, силни и бидете охрабрени да се сакате малку повеќе денес.
