Македонија е во фокусот на гастрономска приказна на „Вог“. Нашата земја беше претставена од модната библија како посакувана дестинација за гурмани.
Со помош на фотографии од Јане Јосифовски и коментари од неколку сопственици на ресторани и хотели, авторката Клер Волкман се обиде да ја долови гурманската душа на Македонија.
„Македонија е земја за која веројатно сте слушнале уз пат – едно од оние места на Балканот кои некогаш беа дел од Југославија. Земја која често е занемарена и заобиколена за сметка на попривлечни земји на блескавото крајбрежје, како Хрватска и Црна Гора. Тоа е место кое поголемиот дел од својот живот е заглавено меѓу земји во војна (Србија и Косово), што им отежнува на посетителите од Западот да му дадат шанса. Тоа е тажно, земајќи предвид што пејзажите се занемувачки убави, луѓето се едни од најгостопримливите... Каде и да одите, секое јадење е приготвено со страст и љубов.... И не само тоа, фокусот е целосно на квалитетот – што значи дека сè е направено од нула, без адитиви и презервативи на кои сме навикнати со храната на Запад“ – пишува Волкман.
И покрај тоа што темата на статијата е храната, статијата доби стотици коментари кои се однесуваат на политиката на Грција кон Македонија. Десетици Грци се категорични дека „Вог“ направи огромна грешка што нè претстави под името Македонија, а не како FYROM.
„Вог, можеби треба да ги едуцирате своите писатели! Очигледно се збунети... Македонија е во Грција. Вие зборувате за FYROM, Скопје, Вардарска?“ – пишува еден читател на сајтот на „Вог“.
„Отстранете ја проклетата статија и стрелајте го оној што ја напиша... трагични луѓе без почит“ – пишува друг.
„Да, во Грција секој оброк е направен со страст и љубов! Бидејќи нема Македонија без Грција... Вог треба да знаете подобро“ – додава трет.
„Македонија е регион во Грција, родното место на Александар Велики“ – тврди четврт.
„Македонија не постои како држава, се вика FYROM, Македонија е дел од Грција“ – се надоврзува петти.
Се разбира, во коментарите се вклучени и Македонци кои се обидуваат со позитивност да гледаат на репортажата.
„Ох Вог, те сакам. Благодарам што ја состави оваа неверојатна сторија за мојата прекрасна земја“ – пишува Илина Пејоска.
„Браво Вог... многу интересно и вистинито за Република Македонија... оставете го она што го велат Грците со испрани мозоци... да живее македонската храна и Македонците“ – пишува Стреван Аврамов.
Текстот „Зошто Македонија станува дестинација за гурманите?“ можете да го најдете тука.
Коментарите на Facebook можете да ги погледнете тука.
