Меган Козиел секојдневно ја подигнува свеста на луѓето за ракот на дојка, бидејќи знае точно како изгледа добивањето на таа страшна дијагноза.
По откривањето на ракот, таа го создаде блогот „She Spakles On“ и својот профил на Instagram за детално да го прикаже своето лекување. Но, откако забремени со своето прво дете, инспиративната жена го користи својот глас за да им влее надеж на жените кои го минуваат нејзиниот пат.
„Од денот кога ми беше поставена дијагноза, одбивав да му дозволам на ракот да ми ја промени судбината. Згазнав цврсто на земјата, одлучив да се борам и да ги исполнам сите мои соништа. Да станам мајка беше дел од нив. Донесов ризична одлука да ги прекинам лекарствата за блокирање на хормоните со надеж дека ќе го живеам мојот сон. Тука сум да ја споделам мојата приказна, да ги охрабрам сите млади жени кои се соочуваат со рак да бидат отворени со докторите од почетокот на нивното патување за нивните соништа, бидејќи ИМА безброј начини да се стане МАЈКА“ – вели таа.
Меган имала само 26 години кога си пронашла грутка на едната града, за која подоцна дознала дека е агресивен рак. Таа морала да помине низ 12 хемотерапии, двојна мастектомија и 30 третмани со радијација, но во ниту еден момент не дозволила ракот да ѝ го уништи сонот дека еден ден ќе стане мајка.
Пред лекувањето, со нејзиниот сегашен сопруг оплодиле 3 јајце клетки кои ги замрзнале за во случај да не може да забремени поради хемотерапиите. Сепак, само 6 месеци откако ги прекинала лекарствата за хормони, таа ја добила првата менструација, а еден месец подоцна дознала дека е бремена.
„Ракот ми го промени животот засекогаш, но кога гледам во ова слатко мало девојче, сите мои стравови за враќање на ракот и повторно лекување исчезнуваат! Многу, многу сум благословена и засекогаш ќе блескам“ – вели Меган, која се породи на 15 септември годинава.
Нејзината ќерка Кендра Џејн Козиел го добила името по онкологот кој ѝ го спасил животот и кој постојано ја охрабрувал НИКОГАШ да не се откажува од сонот да биде мајка.
Во описот на една од фотографиите, Меган накратко раскажа за своето патување од дијагностицирањето, до станувањето мајка.
На 12 октомври 2015 година животот засекогаш ми се промени. Добив повик... незамисливиот повик „Имаш рак“. Бев млада, имав 26 години и штотуку го започнав мојот живот како возрасна личност. Во изминатите 3 години... животот целосно ми се промени. Купивме куќа, стапивме во брак, поминавме низ пункција и направивме 3 ембриони-бебиња кои сè уште се некаде замрзнати, јас поминав низ хемотерапии, ја изгубив косата, радијација, безброј операции, ги изгубив моите гради, добив импланти, имам тело полно со лузни... НО, ПРЕЖИВЕАВ!
Животот дефинитивно ми се промени... Ако ме прашавте пред ракот на 26 години каде се гледам за 5 години, никогаш немаше да се замислам како личност без гради со историја на рак. Но, денес... точно еден месец по раѓањето на нашето бебе-чудо, не можам да смислам нешто за што би била поблагодарна! Точно овој живот би го посакала во мојот 5-годишен план. Ми беше дадена сила и втора шанса да ЖИВЕАМ најдобар живот.
Да, имам лузни, а некои делови од телото ми беа заменети како скршена Барбика, НО жива сум и со нетрпение чекам да го започнам следното поглавје – да бидам МАЈКА!!! Благословена сум.
Сега, Козиел ги охрабрува жените кои имаат рак да ги искористат социјалните мрежи за да се поврзат со личности кои имаат слични животни приказни и кои можат да им влеат надеж.
„Ви ветувам дека не сте сами! Какво и да е вашето патување, има многу жени во светот кои живеат во слична приказна како вашата. Не ги користете социјалните мрежи за завист, за негативност, за да се потсмевате на различните од вас... искористете ги за да пронајдете некој друг како вас, некој во кого ќе се пронајдете, со кого ќе можете да разговарате!“ – вели таа.
Бидејќи октомври е месец за подигнување на свеста за ракот на дојка, Меган повикува на редовни самопрегледи кои се клучни за рана детекција на ракот и за навремено реагирање додека тој е во почетните стадиуми.
