Како да ја зголемите телесната тежина?

Најголем дел од жените се борат со вишокот килограми и постојано се во потрага по нова диета за слабеење. Но, има и многу други жени кои се обидуваат да ја зголемат својата тежина.

Ако сте од втората група, сигурно ви е смачено луѓето да ве игнорираат и да ве гледаат со недоверба кога ќе кажете дека очајно сакате да се здебелите и дека не можете.

Премалата тежина може да предизвика исто толку здравствени проблеми како и прекумерната. Затоа, потребно е да ги земете работите во свои раце и да започнете малку по малку да го оформувате своето тело.

Постојат два начини за да ја зголемите својата телесна тежина – или преку масни наслаги или преку мускулна маса (односно 3 начини ако земете во предвид дека телесната тежина може привремено да се покачи и преку задржување на вода во организмот).

Најдобриот начин да ја покачите телесната тежина е да ја зголемите вашата мускулна маса.

Создавањето на мускулна маса е најдобриот начин да го подобрите вашиот изглед. Ако вежбате умерено, не треба да се плашите дека ќе започнете да личите на бодибилдер. Женското тело не создава многу тестостерон, за наеднаш да станете мускулести.

Што да вежбате?

Ако влегувате во фитнес сала со цел да ја зголемите вашата тежина, не треба да ги правите истите вежби како жените кои сакаат да ја намалат својата тежина.

Вам не ви е потребна патеката за трчање или елиптичните велосипеди. Всушност, не треба да практикувате кардио вежби (аеробик или трчање), затоа што тие се во поголема мера наменети за намалување на тежината.

За да ја зголемите својата тежина, фатете се за вежбите со тегови. Вежбањето со многу мала тежина и многу повторувања е повеќе за тонирање на мускулите. За да ја зголемувате вашата мускулна маса, треба постепено да ја зголемувате и тежината на теговите со кои вежбате.

Не правете многу повторувања. Ограничете се на 4-8 повторувања во една серија и повторувајте ги сериите најмногу 8-10 пати.

Што да јадете?

Консумирањето на брза и мрсна храна не е здрав начин за зголемување на тежината. За да го зачувате вашето здравје и контролирано да се дебелеете, треба да се насочите кон здрава храна.

Вашето мени треба да вклучува:

• здрави масти како омега-3 масни киселини, кои ги има во туната, лососот, ленот и оревите;
• добри протеини присутни во кревкото месо, рибата, месото од домашни птици, јаткастите плодови, семињата и мешунките;
• здрави јаглехидрати, чии најдобри извори се овошјето, зеленчуците и житариците.

Еден ваш примерен појадок може да вклучува мусли со лешници и ореви, млеко, банана и џус, а ручекот – една конзерва туна, 2 домати, зелена салата, една шака маслини, 2 лажички маслиново масло и авокадо.

Внесувајте 500-700 калории повеќе од вашите дневните потреби. Така ќе ги качувате килограмите контролирано. Најздраво е да се насочите кон зголемување на тежината со 0,5-1 килограм неделно, но не и повеќе.

Ако не сте навикнати да јадете многу обилно, најдобро е сега да започнете да јадете 5-6 пати дневно.

Ако пушите, намалете ги колку што можете цигарите, затоа што го убиваат апетитот. Истото важи и за кафето.