Словенија го избра својот претставник за Евровизија. Водителот и комичар Клемен Слакоња ќе ја претставува својата земја со трогателна песна која ја посвети на неговата сопруга.
„How Much Time Do We Have Left“ (Колку време ни останува) е напишана во чест на неговата сакана Мојца, која пред неколку години се избори со тешка форма на рак.
Со текстот на песната, Клемен ја слави силата на својата сакана при соочувањето со болеста, истакнувајќи ја важноста на времето поминато заедно и кревкоста на човечкиот живот.
Видео:
Најавувајќи ја песната, неговата сопруга Мојца објави емотивна порака.
На почетокот на 2016 година, ми беше дијагностицирано сериозно заболување на коскената срцевина, кое за среќа го надминав и целосно закрепнав. Клемен ми беше огромна поддршка во овој период. Тој не само што ги презеде сите семејни обврски, дозволувајќи ми да се посветам на моето лекување во мир. Уште поважен ми беше фактот што тој ниту еднаш не ги доведе во прашање моите одлуки на патот кон самолекувањето или мојата верба дека ќе успеам.
Песната „How Much Time Do We Have Left“ требаше да биде изненадување за мене на неговиот претстоен албум, кој ќе биде објавен подоцна оваа година. Но, како што би сакала судбината, го слушнав претходно и веднаш ми беше јасно дека нејзиното време е СЕГА! Дека мора да лета меѓу луѓето. Затоа што ги отвора срцата и лекува.
Кога некој ќе се разболи, целото внимание се свртува кон него. Кога се бориш за својот живот, луѓето кои стојат покрај тебе не сакаат да те оптоваруваат со своите чувства на страв, тага, очај... Признавам дека не ни помислував дека зад исправеното и цврсто држење на Клемен може да има нешто друго освен: „Го можеме ова! Ќе успееш“.
Тој не зборуваше за тоа. Веројатно му беше премногу тешко. Но, ги отпеа тие чувства во песна. Многу работи не се кажуваат, но се чувствуваат. Затоа што е искрено, без преправање. Затоа што песната не беше создадена како рецепт за победа, туку е чиста изјава на љубов. Ода на храброста, надежта, вербата и победата! Пред сè, фактот дека сите сме минливи и дека не треба да го земаме здраво за готово времето со нашите најблиски. Наместо расправии, интриги и конкуренција, да го посветиме времето на дружење, искрени разговори, градење заедница и ширење добрина.
Парот има две деца.
