„Модата е за сите и таа не познава години“ – ова е пораката која Ренија Јазѕик ја пренесува преку стилските приказни на својот Instagram профил.
56-годишната блогерка од Полска смело демонстрира дека е возможно да се ужива во модата на секоја возраст. Со своите модни комбинации, Ренија ги руши застарените правила и стереотипи за соодветно облекување на жените според возраста.
„Мојот Instagram профил е доказ дека модата може да инспирира и фасцинира независно од возраста. Сакам да им покажам на луѓето над 50 години дека сè уште може да имаме апетит за мода и да уживаме носејќи ги најновите трендови. Мислам дека подоцнежниот живот е совршено време жените да се фокусираат на себе и на своите потреби. Верувам дека модата е за сите, за жените на сите возрасти.“
„Сакам да се борам против стереотипите дека возрасните жени треба да се откажат од своите страсти, амбиции и права да изгледаат и да се чувствуваат убаво само затоа што навршиле одредена возраст.“
„Не мислам дека постои некое парче облека кое жените на 50 години не треба да го носат. Сè се сведува на тоа што ние мислиме дека ни прилега и во што се чувствуваме комфорно. Лично јас имам комплекси за нозете, затоа не носам мини здолништа или многу кратки панталони, бидејќи не се чувствувам комфорно во нив. Верувам дека за да изгледаш добро, всушност треба да се чувствуваш добро во она што го носиш“ – вели таа.
