Благодарение на електронските медиуми, добиваме можност да ги погледнеме најновите колекции на дизајнерите само неколку часа или дена по нивното покажување во јавност. Но, тоа не е случај и со колекциите на Том Форд.
Исто како претходната колекција, и колекцијата есен/зима на Том Форд беше прикажана на тајна модна ревија. Одржана уште во февруари, ревијата беше дел од Лондонската недела на модата, а на неа присуствуваа само мал број модни уредници, стилисти и новинари кои потпишаа договор со кој им беше забрането да објавуваат какви и да било детали за колекцијата до почетокот на летото.
Сега, 49-годишниот дизајнер реши да ни ја открие колекцијата преку видео-каталог. Доследен на својот стил, Форд направи уште една ултра женствена и луксузна колекција, во која преовладуваат префинети материјали, чипка и крзно во бои на скапоцени камења.
