Најдобриот начин да останете здрави е да стоите понастрана од цигарите, да бидете во форма и редовно да практикувате физичка активност. Тоа е заклучокот на големо истражување во рамките на коешто биле проучувани податоци од вкупно 40 помали истражувања спроведени во изминатите 4 години.
Научниците откриле дека секојдневната прошетка е особено важна и дека може да делува како превенција од 24 болести, меѓу кои рак и деменција.
Пешачете по 30 минути секој ден за да си го подобрите здравјето
Редовните прошетки придонесуваат за намалување на ризикот од појава на остеопороза, дијабетес тип 2, депресија, дебелина и висок крвен притисок. Освен тоа, секојдневното раздвижување го намалува и ризикот од срцеви болести и срцев удар.
За целите на истражувањето било определено дека редовна физичка активност се смета активност во времетраење од 150 минути неделно, т.е. 30 минути пешачење или возење велосипед 5 дена во текот на неделата.
Позитивниот ефект на дневната прошетка бил забележан и кај мажите и кај жените, но бил уште поголем кај непушачите, оние кои се хранат здраво и кои немаат проблем со дебелината.
„Од истражувањето станува јасно дека мажите и жените од сите возрасти треба да се поттикнуваат да бидат физички поактивни за доброто на нивното здравје“ – изјавил физиотерапевтот Лесли Алфорд.
Искористете ги последните топли денови оваа година за да се размрдате и да го подобрите вашето здравје.
