За помалку од еден месец најмалото коњче на светот ќе наполни една година. Младиот Ајнштајн уште по раѓањето на 22 април минатата година предизвика огромен интерес и привлече илјадници луѓе кои патуваа до Њу Хемпшир само за да го видат.
Минијатурното коњче имаше и можност да гостува во шоуто на Опра и многу други популарни емисии низ светот, па по повод неговиот прв роденден сопствениците планираат да издадат книга во која ќе биде опишан неговиот возбудлив живот.
Ајнштајн и коњот Плејбој
„Ова беше неверојатна година за нас и за Ајнштајн... Се надеваме дека книгата ќе ја задоволи желбата на луѓето да го видат Ајнштајн и неговиот сладок и невообичаен живот“ – изјавил Чарли Кантрел кој го одгледува малиот коњ заедно со неговата жена Рејчел.
Ајнштајн е висок само 50,8 сантиметри, но сè уште не може да добие признание за најмал коњ на светот од Гинис, затоа што е неопходно прво да наполни 4 години. Сепак, неговите сопственици се скоро убедени дека Ајнштајн престанал да расте.
Ајнштајн и кучето Лили
Токму поради тоа што е толку мал, Ајнштајн не може да се дружи со другите коњи. Понекогаш тој има средби со голем црн коњ од соседството и најчесто се дружи само со кучето Лили.
