Светлана Мојсов непрекинато реди успеси.
Македонската научничка ја доби престижната награда „Princesa de Asturias“ од шпанското кралско семејство. На церемонијата во Овиедо, Шпанија, на
Веста на социјалните мрежи ја објавија од македонската амбасада во Кралството Шпанија и амбасадорот Едмонд Адеми, кој беше поканет на настанот од Кралот Фелипе VI и Принцезата Леонор.
„На доделувањето на наградите ‘Princesa de Asturias’ во Овиедо, Светлана Мојсов, македонска хемичарка која живее и работи во САД е една од добитничките на престижната награда за 2024 година во категоријата за научно и техничко истражување... Наградата ‘Princesa de Asturias’ е една од најпрестижните награди што од 1981 година ги доделува Шпанското кралско семејство, односно наследникот на шпанскиот трон, Принцезата Леонор, која до преземањето на шпанскиот кралски трон ја носи титулата Принцеза на Астуријас“ – стои во текстот.
Мојсов, која е професор на Универзитетот Рокфелер во САД, ја дели наградата заедно со Џоел Хабенер, Даниел Џ. Друкер, Јенс Холст и Џефри Фридман. Нивните истражувања придонеле за „развивањето на ефективни лекарства за справување со дијабетес и дебелината, како и за ублажување на асоцијативни форми на патологии“. Таков е на пример лекот „Оземпик“. Овие лекарства им го подобруваат квалитетот на живот на стотици милиони луѓе ширум светот.
Светлана Мојсов е првата Македонка која ја добива оваа престижна награда.
Наградата „Princesa de Asturias“ се доделува од шпанското кралско семејство на личности и организации кои имаат значителни постигнувања во науката, хуманитарните активности и јавниот живот. Таа се смета за шпанска варијанта на Нобелова награда.
