Македонија треба да се гордее со својата талентирана младина.
Драгана Рајкова од Валандово e млада ѕвезда на литературната сцена. Таа има само 11 години, а веќе се подготвува за промоцијата на својата втора книга.
По издавањето на стихозбирката „Спомени од моето детство“, талентираното девојче ја напиша книгата „Ѕвездено небо“, која содржи 30 песнички придружени со соодветни илустрации.
„Книгата содржи точно 30 песни, а секоја песна има своја илустрација. Промоцијата ќе биде после велигденската празнична атмосфера на 23 април кој е Светски ден на книгата и авторските права и поради тоа промоцијата ќе биде на еден ваков убав ден“ – изјави Драгана за Femina.mk
„Чувството што го чувствувам е незаменливо. На секој што се труди во животот му го посакувам таквото чувство. Навистина е неверојатно и воодушевувачки да ја држиш во раце твојата втора книга на само 11 години“ – дополни таа.
За Драгана не постојат правила или ритуали за пишување. „За мене не постојат правила кога пишувам. Тој што пишува, пишува од срце.Тој што пишува, пишува за тоа што го чувствува, тоа што го опкружува, тоа што го посакува, а инспирација може да се пронајде во сè околу нас. Многу сакам да читам книги, секоја книга ни отвара нови врати и ни дава знаења.“
Љубовта кон пишаниот збор кај Драгана се родила уште од мали нозе, а нејзин сон е да го следи тој пат.
„Јас од многу мала си имам сама измислувано приказни и песнички, и им ги раскажував на најблиските, а тие внимателно ме слушаа, но тогаш не ги запишував. Но, на 7 години веќе ја запишав мојата прва песничка посветена на мајката. Оттогаш, до денеска напишав многу песнички, добив многу награди и разбрав дека патот по кој што треба да чекорам е патот на уметноста“ – ни откри таа.
Кога не твори свои дела, Драгана ужива да чита книги и сака да истражува интересни приказни.
„Во слободно време обожавам да читам книги и да истражувам за интересни работи, како што е древниот Египет и снежното суштество јети. Исто така, сакам да создава, композиции на моето пијано. Многу истражувам и ме интересираат азиските земји Кина, Јапонија, Тајланд и други, затоа и почнав да го изучувам и кинескиот јазик.“
Првата книга, која се состоеше од 44 песнички, Драгана ја издаде на 10-годишна возраст.
