Сензибилни, грациозни и донекаде екстравагантни венчаници ја претворија Невестинската модна недела во рајски спектакл за идните невести.
Обелоденувајќи ги колекциите за сезоната пролет 2015, дизајнерите ги заскокоткаа фантазиите на девојките кои веќе размислуваат за големиот ден.
Деликатна тантела која делуваше како префинети тетоважи, „Гетсби“ гламур од 20-тите, почит кон традиционалните силуети, елегантен минимализам, фустани во стил на грчка божица и паднати прерамки кои ги разголуваат рамената беа само неколку од највпечатливите трендови.
Jenny Packham
Џени Пекам пронајде инспирација во серијата фотографии „The Goddesses“ на Мадам Ивонд од 30-тите години на минатиот век. Освен за гламурозните венчаници кои пленат со интригантни детали и ретро вибрации, ревијата доби и гласни аплаузи затоа што на пистата зачекорија и крупни манекенки.
Reem Acra
Рим Акра се фокусира на блескави детали кои го шармираат окото. Колекцијата „Mirror Mirror“ крие суптилен сексапил, а одушевува со луксузни кристални и бисерни акценти.
Carolina Herrera
Каролина Ерера го обожава класичниот дамски изглед, па нејзината колекција се одликува со нежност и женственост. Луксузна свила, тенок тул и елегантни апликации и везови хармонично се надополнуваат за постигнување на романтичен и сензуален ефект.
Oscar de la Renta
Искусниот Оскар де ла Рента ги заведе и девојките кои сонуваат за бохо свадба на тропска плажа и девојките кои сакаат да се чувствуваат како принцези на свадбената церемонија. Класична елеганција преовладуваше на ревијата на која ѕвезди беа слатките мали девојчиња.
Monique Lhuillier
Колекцијата „My Eternal Daydream“ на Моник Лулие е инспирирана од уметничките дела на американскиот сликар Џон Сингер Сарџент. Слоевитоста на креациите донесе умерена драма на пистата и ѝ даде нова димензија на безвременската елеганција.
