Во сезоната во која доминираат минимализмот и женственоста, стилистите немаа друг избор освен да се прилагодат и да постават едноставни елегантни трендови и кај фризурите. Разиграна, безгрижна, уредно фенирана со многу волумен, слободно пуштена или собрана во модифицирано коњско опавче – косата во новата сезона треба да изгледа природно, а сепак да остава впечаток.
Еве кои се најдоминантните трендови кај фризурите за топлата сезона:
Плетен и романтичен хаос
Плетената коса стана вистински хит и нè принуди да ја искористиме фантазијата за создавање на непредвидливи текстури на косата. И во наредната сезона пролет/лето слободно дозволете ѝ на вашата вештина за плетење на косата да дојде до израз, затоа што плетенките не го отстапуваат своето место меѓу трендовите.
Невообичаени варијации на коњското опавче
Коњското опавче веќе не е само за во фитнес салата. Забавни варијации на класичното коњско опавче неколку сезони ги преплавуваат модните писти и улиците. Не е важно дали ќе го фатите ниско или високо на главата и дали ќе го замазните или ќе му дадете волумен, важно е да биде интересно и да има одреден елемент кој ќе го диференцира од обичното коњско опавче. Стилистите предлагаат и фризури со неколку коњски опавчиња поврзани на интересен начин. Особено популарно е коњското опавче кое е свиткано и протнато оддолу (слика 3).
Урбани текстурирани прамени
Брановидните прамени кои беа актуелни во изминативе сезони сега стануваат поисправени, но сепак косата си ја задржува привлечната текстура.
Гламурозен и богат волумен со фенирање
Косата со волумен доживува очекуван кам-бек. За максимален ефект, не ја тапирајте косата, туку обидете се да го добиете волуменот со фенирање со голема четка за коса. Така, вашиот изглед ќе биде поприроден, а сепак ќе зрачи со гламур.
Замазнета „мокра“ коса
Идејата која се крие зад мократа коса е да изгледате како да сте излегле од морето и да сте си поминале со прстите низ косата. „Мокрите“ фризури се контра-тренд на косата со богат волумен. Иако на модните писти доминираа фризури кај кои косата беше залижана наназад, сепак во реалниот живот побезбедно е мокриот тренд да го искористите за фризури кај кои косата е собрана во клопче.
Ретро стилови
Стилот од минатото е непресушен извор на идеи и за дизајнерите и за стилистите. Ретро бранови, тапиран волумен, вртени прамени од 20-тите, француски „твист“... Не дозволувајте таквите креативни идеи да останат во минатото и инкорпорирајте ги во вашиот стил за да го покачите нивото на гламур и елеганција.
Венче
Женствените модни трендови ги актуализираа нежните и романтични додатоци за коса. Без оглед на должината на косата, секој може да искористи венче за стилизирање на прамените. Различните стилови можат да ви помогнат да изгледате неодоливо слатко, или забавно и креативно, или пак, секси и заводливо.
Марама на глава
Не се плашите од промените и обожавате нестандардно стилизирање на косата? Тогаш трендот „марама на глава“ е токму за вас. Покажете смелост преку марами со принт, но ако не сакате да паднете во сечиј поглед, изберете марама во неутрална боја. Дури и наједноставната модна комбинација може да изгледа ултра шик ако ја надополните со интересна марама на косата. Овој штосен тренд сигурно ќе добие поголем замав на плажите во текот на летото.
Долги шишки
Фризурите со шишки се омилен селебрити тренд во моментов. Многу холивудски дами внесоа промена во својот имиџ со потскратување на шишките. Пролетниот и летниот период е погоден за промени, па ако сакате да го освежите вашиот изглед, шишките со должина до под веѓите се безбедна алтернатива.
Патецот... не е важно каде ќе го поставите, бидејќи во тренд се и фризурите со патец во центарот на главата и со патец поставен настрана.
За оние најхрабрите... стилистите советуваат експериментирање со бојата на косата. Но, не станува збор за осветлување или затемнување на косата со неколку нијанси, туку за бојадисување со воочливи розови и сини нијанси.
