Оливија Палермо и Јоханес Хибл стапија во брак. Привлечниот пар се заколна на вечна љубов за време на интимна церемонија во Бедфорд, Њујорк.
Првите фотографии од венчавката на која присуствувале само најблиските роднини и пријатели на парот беа објавени на сајтот на Палермо.
За големиот ден, модерната 28-годишна невеста избрала нетрадиционална креација од Каролина Ерера и сини обувки од Маноло Бланик. Свадбената креација била составена од кремова блуза од кашмир и шорцеви прекриени со здолниште од тул, сатен и свила, со висок шлиц украсен со цветни детали.
Свадбениот стил на Палермо вклучувал едноставна фризура „коњско опавче“ и софистицирана шминка, како и минималистички накит – мали обетки од Александа Мор и белегзија купена од Џодпур, Индија. Младоженецот пак избрал костум од германскиот бренд Марк Антони.
„Навистина сакавме овој прекрасен ден да остане приватен и специјален за нас и цел ден уживавме со нашето семејство и двајца пријатели“ – изјавила среќната невеста.
Пред да си го кажат судбоносното „Да“, Оливија и Јоханес беа во врска шест и пол години. Тие се верија пред неколку месеци, за време на новогодишно патување на егзотичниот Сент Бартс.
