Маја Андоновска Илијевски, Ангела Ѓоргиева, Бојана Нушкова, Евгенија Ризова и Катерина Кузмановска се петте дами во филмскиот мултимедијален едиторијал за колекцијата „Три“ на модниот дизајнер Папаз.
„Оваа колекција претставува симбиоза на стилови од западни и источни култури, претопени во модна силуета адаптирана на нашето поднебје. Изобилува со елеганција и носливост, вбројува блузони и капути со кимоно и ранглан ракави, здолништа и панталони во широк крој и вечерни фустани. Токму овие пет дами ги избрав да бидат дел од овој мултимедијален едиторијал со една цел, а тоа е моќно да ја пренесат пораката“ – вели Папаз.
На проектот работеше тим од професионалци: режијата е на Батухан Ибраим, директор на фотографија е Стефан Ѓоргиевски, а музичката подлога е на Димитар Андоновски. Фотограф на проектот е Петар Тасевски, асистент на продукција е Александра Гатовска, асистент на камера е Александар Котевски, додека за светлото се погрижи Никола Ѓоргиевски. Ксенија Вангеловска беше задолжена за шминката, а Ајтен Алиевска за фризурите.
„Целиот едиторијал се снимаше и фотографираше во НУ Народен театар Битола, и би сакал да изразам благодарност до нив, како и до НУ Центар за култура-Битола, ФДУ Скопје и Горан Трпчевски“ – додава Папаз.
ВИДЕО
Две од креациите од новата колекција, Маја Андоновска Илијевски носеше на отворањето и затворањето на Филмскиот фестивал „Браќа Манаки“ во Битола.
