Влезете накратко во луксузниот свет на Кристина Базан, 20-годишната девојка која веќе три години ги споделува своите модни авантури на блогот Kayture.
Смело комбинирајќи креации од реномирани брендови како Louis Vuitton, Dolce & Gabbana, Saint Laurent, Dior, Mango, Guess и Jimmy Choo, Базан импресионира и инспирира. За кратко време нејзиниот стилски дневник стана најпопуларен блог во Швајцарија, а таа се истакна како влијателна трендсетерка која соработува и со престижни компании како Chopard, Piaget и Cartier.
„Мојот личен стил се развива околу класична елеганција и чист минимализам, иако одвреме-навреме сакам и да си играм со принтови и впечатливи парчиња, особено за време на модните недели“ – вели таа.
Многу модни ентузијастки сонуваат да „влезат во чевлите“ на Базан, бидејќи таа освен што поседува фасцинантна колекција облека, непрекинато патува низ светот.
Фотоапаратот недискутабилно ја обожава Базан. Квалитетните фотографии со кои таа одушевува се дело на нејзиното момче Џејмс.
Додека стотици илјади лојални фанови се инспирираат од стилот на Кристина, таа црпи инспирација од неприкосновените модни икони, па признава: „Се огледувам на класични убавици како Грејс Кели или Одри Хепберн во однос на стилот.“
