Марија Брањас Морера наполни 117 години.
Најстарата личност на светот, која е родена на 4 март 1907 година, го прослави својот роденден во дом за стари лица во Шпанија. Марија живее таму 23 години.
Морера ја доби титулата Најстара личност на Земјата од страна на Гинисовата книга на рекорди во јануари 2023 година.
„Многу е благодарна за сите примени честитки и интересот кој толку многу луѓе го покажаа за нејзиното здравје. Среќна е што можеше да го слави овој специјален ден во интимна атмосфера со семејството и колегите и им посакува на сите среќен понеделник“ – изјави Ева Карера, директорка на домот каде што живее Марија.
Бидејќи многумина се интересираат за нејзиното здравје, од домот за стари лица известија дека Марија има потешкотии со слушањето и движењето, но дека нема никакви други физички или ментални здравствени проблеми. Таа се согласила да помине низ научни тестирања со надеж дека ќе помогне во откривањето на тајната на долговечноста.
Научниците сметаат дека нејзината долговечност се должи пред сè на генетиката, бидејќи неколку членови од нејзиното семејство се постари од 90 години.
Покрај генетиката, Марија смета дека нејзината долговечност се должи на тоа што живее во: „ред, спокојство, добра врска со семејството и пријателите, контакт со природата, емоционална стабилност, отсуството на грижи и каење, многу позитивност и држење подалеку од токсични луѓе“.
Во 2020 година, Марија стана најстарата личност која се излекува од КОВИД-19.
