Шенон Доерти излезе како победничка од мачната двегодишна битка со рак на дојка. 46-годишната филмска ѕвезда редовно споделуваше на Instagram фотографии од емотивните моменти и ја отвораше својата душа пред светот.
Октомври е месец посветен на подигнување на свеста за рак на дојка, па по тој повод, Шенон објави емотивна фотографија и моќна порака.
Фотографијата била направена кога таа започнала да ја губи косата како резултат на хемотерапијата.
„Оваа слика е многу интимна за мене. Тукушто имав започнато со хемотерапија. Користев ладна капа* со надеж дека нема да ја изгубам косата. Крајниот резултат беше прамени коса во моите раце. Ми се гадеше, се чувствував како да се губам себеси.“
„Добив луѓе и изгубив луѓе. Станав слаба, станав силна. Се чувствував грда, но внатрешно поубава од кога било претходно.“
„Се сеќавам на ова како да беше вчера, како да беше пред неколку минути. Ракот има многу фази. Шок, негирање, прифаќање, лутина, презир, бунтовништво, страв, ценење, убавина. Ремисија. Дури и тогаш, фазите продолжуваат да доаѓаат. Ракот е засекогаш со тебе. Тие кои се соочиле со него знаат дека тој сè уште влијае на тебе и откако ќе го победиш, на добри и на лоши начини. Сè уште минуваш низ ролеркостер на емоции. Сè уште имаш потреба од поддршка и љубов. И сè уште можеш да го зграпчиш животот и да живееш, живееш, живееш.“
*Терапијата со ладна капа овозможува ладење на скалпот, при што се стегаат крвните садови на скалпот и лекарствата од хемотерапијата не достигнуваат до фоликулите на влакната. Идејата е пациентите да зачуваат дел од косата за време на лекувањето.
Минатата година Шенон си ја избричи главата откако започна да ѝ опаѓа косата.
Пред шест месеци таа објави дека го победи ракот, а два месеци подоцна сподели и фотографии од пораснатата коса.
