Во улога на амбасадор на канцеларијата на високиот комесаријат за бегалци на Обединетите нации (УНХЦР), Анџелина Џоли посети камп за бегалци во Јордан.
Холивудската ѕвезда во повеќе наврати се обидува да го привлече вниманието на јавноста и на светските лидери кон оние кои страдаат од долгогодишниот воен конфликт во Сирија.
За време на својата четврта посета на Јордан, Анџелина изјави: „Тука има деца кои не се сеќаваат на друг живот освен на оваа сурова, пустинска околина и огради со бодликава жица. Тука има тинејџери кои носат ужасни ментални и физички рани од конфликтот. Над половина од бегалците во Јордан се под 18 години. Моите деца се на таа возраст и како и секој друг родител, невозможно е да не си замислам како би било кога моите деца би биле во ваква ситуација и ми се крши срцето.“
Џоли го продолжи говорот обраќајќи им се на светските лидери и барајќи од нив да си го постават фундаменталното прашање за тоа кои се главните причини за конфликтот во Сирија и што е потребно за да се стави крај.
