Најневообичаеното 72-ро издание на Еми наградите се одржа синоќа во „Стејплс центарот“ во Лос Анџелес. Џими Кимел беше водител на манифестацијата без публика во празна сала и виртуелно ги додели наградите за најдобрите во телевизиската индустрија за годината која измина.
Видео
Најголемото изненадување на вечерта беше Зендеја, која ја присвои наградата Најдобра актерка во драмска серија за „Euphoria“ и стана најмладата филмска ѕвезда која ја има добиено оваа статуетка. 24-годишната Американка победи импресивни актерки за да застане на челната позиција. Во истата категорија беа номинирани и: Џенифер Анистон (The Morning Show), Оливија Колман (The Crown), Џоди Комер (Killing Eve), Лора Лини (Ozark) и Сандра О (Killing Eve).
За Најдобра ТВ серија комедија беше избрана „Schitt’s Creek“. За улогите во истата серија, Јуџин Леви ја доби статуетката за Најдобар актер во ТВ серија комедија, Кетрин О’Хара беше прогласена за Најдобра актерка во ТВ серија комедија, Даниел Леви стана Најдобар актер во споредна улога во ТВ серија комедија, а Ени Марфи застана на челната позиција во категоријата Најдобра актерка во споредна улога во ТВ серија комедија.
Екипата на „Succession“ ја присвои статуетката за Најдобра драмска серија. За одличните актерски способности во истата серија, Џереми Стронг беше прогласен за Најдобар актер во драмска серија.
Најдобра лимитирана серија или филм стана „Watchmen“. Реџина Кинг за улогата токму во „Watchmen“ беше прогласена за Најдобра актерка во лимитирана серија или филм.
За Најдобар актер во лимитирана серија или филм беше избран Марк Рафало за „I Know This Much Is True“.
Целосната листа на победници можете да ја погледнете тука.
