Напредната возраст не е пречка за некои дами при негувањето на специфичен стил на облекување. Храбрите и креативни дами кои ги обединува блогот „Advanced Style“ изненадуваат и шармираат со комбинации зачинети со ексцентричност и колоритен поглед кон животот.
Сите тие имаат над 60 години и не ја кријат својата љубов кон модата и страста за стилски новитети. Зад несекојдневниот блог стои фотографот Ари Сет Коен кој вели: „Жените кои ги фотографирам знаат што сакаат, знаат што им одговара на телото и се облекуваат за себе. Не се облекуваат базирајќи се на трендови.“
Популарноста на блогот го поттикна Ари, кој „лови“ модерни дами на улици и низ паркови, да издаде книга со најдобрите фотографии, а сега тој го промовира и првиот документарен филм за осум од неговите бестрашни модни експериментаторки.
Возрасните дами со богато животно искуство честопати споделуваат и совети кои вреди да се прочитаат.
„Твоето тело ти е најдобар пријател на светот. Сметам дека луѓето очекуваат премногу од себе, а тоа не води кон среќа. Го пропуштате половина свој живот додека се обидувате да бидете совршени“ – вели 94-годишната Илона Ројс Смиткин.
„Биди повеќе, изгледај помалку. Не се плаши да кажеш колку години имаш, тоа е глупаво. Биди горда на својата возраст“ – вели 99-годишната Роуз.
„Не носи само марка, носи го она што изгледа добро на тебе... Креирај сопствен стил. Можеш да носиш нешто тренди одвреме-навреме, но носи го она што ти прилега.“
Трејлер за филмот „Advanced Style“:
