Алонсо Матео е вистинска модна сензација на Instagram. 5-годишното дете привлекува фанови со модерниот стил и фраерските пози. Облечен во дизајнерска облека од брендови како Том Форд, Гучи, Диор, Стела Мекартни и Марк Џејкобс, Алонсо секојдневно изненадува со нови и нови комбинации.
Најчесто Алонсо самиот ја избира својата облека од големиот плакар во кој еден ѕид е исполнет само со обувки. Но, заслужна за модниот избор на малото дете е и неговата мајка стилистка, Луиза Фернанда Еспиноза.
Фотографиите од Алонсо прво започнала да ги објавува на Instagram неговата мајка, која во моментов има над 133.000 „следбеници“, но сега Алонсо самиот привлекува обожаватели на неговиот профил.
„Обожавам костуми, патики и очила за сонце. Сакам да се облекувам како татко ми, затоа што има кул костуми“ – изјавил Алонсо за The Cut.
Финансиите очигледно не се проблем за родителите на Алонсо и тие имаат можност да му обезбедат скапа брендирана облека – Луиза постојано е во тек со модните трендови кај детската облека, а нејзиниот сопруг е CEO на приватна фирма.
Комплиментите не се реткост при секое објавување на нова фотографија, но одвреме-навреме во коментарите се критикувани родителите на модерното дете. Во негативните коментари најчесто се вели дека Алонсо е разгален или дека родителите го учат да ги цени само материјалните нешта во животот, или пак, дека неговиот стил е пресилен и дека изгледа како минијатурна возрасна личност. Но, неговата мајка вели дека знае како да го воспитува своето дете и дека му дозволува да се облекува на тој начин само затоа што тој се забавува.
„Кога одиме на шопинг, ако тој сака мокасинки како оние на неговиот татко и можам да си ги дозволам, ги купувам. Добро се справуваме растејќи го нашиот син. Тој е секогаш љубезен, приземен, тој е толку слатко момче“ – рекла таа во интервју за The Cut.
Алонсо со мајка си Луиза
