Татко со фотошопирани фотографии ѝ одговара на саканата секојпат кога таа ќе го праша дали бебето е добро

Татко пронајде забавен начин за да ѝ одговори на саканата кога таа ќе му се јави за да провери дали бебето е добро. Тој шеговито ѝ испраќа фотографии на кои нивната ќерка е фотошопирана во опасни ситуации.

Кени Доус од Белгија ја презел грижата за бебето во вторниците откако неговата девојка морала да се врати на работа. Тогаш нивната ќеркичка Аликс имала само три месеци, па мајката постојано го прашувала како е бебето и барала тој да ѝ испраќа фотографии.

„Кога мојата девојка мораше да се врати на работа, одлучивме секој вторник јас да ја преземам грижата за нашата ќерка. Додека работеше, таа постојано ми бараше фотографии за да проведи дали бебето е добро. Тогаш одлучив да направам нешто забавно“ – рекол Кени.

Забавниот татко со помош на Фотошоп ја поставува Аликс во опасни ситуации несоодветни за мало дете, но таа никогаш не е вистински во опасност.

„Кога мојата девојка ја виде првата фотографија, мораше двапати да ја провери за да сфати што се случува, но по кратко време со нејзините колеги почнаа да бараат да им испраќам нови фотографии. Таа е секогаш среќна со резултатот“ – објаснува тој.

Откако видел дека неговите фотографии мамат насмевки, тој го создал Instagram профилот „On Adventure With Dad“, каде ги објавува заедничките авантури. Во февруари, парот ја доби втората ќерка, која веднаш се најде на фотографиите.