Теса Вирту и Скот Моир го освоија златото на Зимските олимписки игри во Пјончанг, Јужна Кореја.
Канадската танцова двојка одушеви во кратката програма со енергичен настап на латино, самба и ча-ча музика, но и во слободната програма кога танцуваше на музика од „Мулен Руж“.
„Пресреќна сум со овој натпревар. Таа изведба беше навистина специјална и навистина незаборавна. Златниот медал е само црешата на тортата“ - изјави Вирту.
Ова е петти олимписки медал за успешниот пар, кој е заслужен за победата на Канаѓаните и во групните натпреварувања. Претходно тие освоија злато на ОИ во Ванкувер во 2010 година и сребрени медали на ОИ во Сочи во 2014 година.
Теса и Скот најавија дека планираат да се пензионираат по завршувањето на натпреварувањата. Талентираните спортисти лизгаат заедно 20 години.
Француската двојка денес го освои сребрениот медал, додека бронзата заврши кај братот и сестрата Алекс и Маја Шибутани од САД.