Запознајте ја Кејти Мид, првата жена со Даунов синдром која е заштитно лице на производ за разубавување.
Компанијата „Beauty & Pin-Ups“ ја ангажираше Мид за да го претставува нивниот најнов производ за коса наречен „Fearless“ или „Бестрашен“, затоа што според раководителите на компанијата, таа е најбестрашната личност којашто ја познаваат.
Кејти има преживеано операција на срце, има освоено злато на параолимпијада и е амбасадор на организацијата за лица со пречки во развојот „Best Buddies International“. 35-годишниот модел постојано ги руши стереотипите и бариерите за лицата со Даунов синдром коишто постојат во општеството, покажувајќи дека секоја личност е убава.
„Кејти е и ќерка, сестра и пријателка која ги руши бариерите, стереотипите и стигмите и освои безброј срца, вклучително и нашите. Таа е нашата единствена инспирација за нашиот најнов производ“ – пишуваат од компанијата.
Покрај тоа што е заштитно лице на „Fearless Hair Rescue Masque“, Мид има и друга мисија пред себе – да ги инспирира луѓето – и може да се каже дека е многу успешна во неа.
„Луѓето ме гледаат поради она што сум. Сакам да правам нови и различни нешта и да ги инспирирам жените да го направат истото. Убавината припаѓа секому“ – смета Мид.
