Сијамски близначки добија шанса да живеат нормален и самостоен живот откако беа раздвоени по 24-часовна операција.
9-месечните Абигејл и Микаела, кои биле поврзани со главите, одлично напредуваат откако тим од медицински лица успешно ги раздвои пред околу две недели. Оперативниот зафат беше направен во Детската болница „UC Davis“ во Сакраменто, а тимот се состоел од повеќе од 30 хирурзи, медицински сестри и анестезиолози. Тоа била прва операција од овој тип во болницата.
Случајот на Аби и Мика привлече големо внимание, бидејќи е вистинска реткост. Само два проценти од сијамските близнаци се раѓаат поврзани на главата. Тоа се случува отприлика еднаш на 2,5 милиони раѓања.
Родителите Антолиј и Лилија, како и тројцата браќа на близначките, се пресреќни.
„Беше многу специјално. Плачев додека ги држев. Очите ми беа полни со солзи. Сите мои грижи исчезнаа. Не ми беше тешко повеќе, чувствував олеснување“ – рекла Лилија.
„Бевме навикнати тие да бидат заедно, а сега гледаме две различни девојчиња, две различни тела и... тоа едноставно е неверојатно“ – рекол Антолиј по операцијата.
Лилија открила дека нејзините бебиња се поврзани со главите во 11-тата недела од бременоста.
„Бев шокирана и не ми се веруваше. Но, подоцна Бог ми даде внатрешен мир, а мојот сопруг ме поддржуваше и охрабруваше“ – рекла Лилија за моментот кога ѝ ја соопштиле веста.
„Состојбата која ја имаат е многу уникатна. Докторите секогаш велеа дека е една на милион“ – додала таа.
„Тие се чудо близначки. Може да се каже дека се обожаваат една со друга, дури и ако се раздвоени сега. Во првите неколку дена, Мика ќе ја подадеше раката за да ја пронајде Аби и Аби ја бараше Мика. Беше многу слатко. Секогаш се држеа за рака додека спиеја“ – вели Лилија.
Среќната мајка изјави дека вечно ќе им биде благодарна на сите кои помогнаа во раздвојувањето на нејзините ќеркички.
„Да се каже дека им сме благодарни не е ништо. Тие ни се како семејство сега. По сè што поминавме заедно... едноставно ги сакаме за сè што направија и сакаме да им кажеме дека ќе им бидеме благодарни до крајот на нашите животи“ – вели таа.
