Мухамед Максуд беше успешно опериран.
21-годишниот студент доби нов бубрег, а донор беше неговата самохрана мајка. Среќната вест ја споделија од Ohrid1 и Ecrowd и напишаа:
„Кога ќе кажат дека мајката те сака повеќе и од себе, мислат токму на ова! Мухамед го доби бубрегот од неговата мајка, а операцијата поминала одлично!“
Мухамед страда од ретка болест на бубрезите и имаше потреба од трансплантација за да живее нормален живот. Претходно тој беше зависен од секојдневна дијализа.
Апелот за помош за Муки беше објавен минатиот месец, а потребните 20 илјади евра се собраа за само една недела благодарение на македонските граѓани и дијаспората. Мухамед им се заблагодари на сите вклучени во хуманитарната акција.
„Ви благодарам на сите оние кои со искреност и со секоја можна алтернатива помогнаа за собирањето финансии за моето лекување, благодарност упатувам до секој кој ме поддржа, ми помогна и благодарност за сплотеноста и организираноста на сите познати мои пријатели, познаници, непознати, луѓе со големи срца и искреност. Благодарам ОХРИДЕ, покажавте хуманост без разликување на вера, нација и посебно фала за СТРУГА. Возбудата е голема и очекувајте ме со добри вести“ – напиша тој на Facebook.
