Ева Лонгорија и нејзиното синче Сантијаго беа ѕвезди на црвениот тепих на Global Gift Gala во Женева.
50-годишната актерка беше почесен претседател на гала-вечерта во хотелот „President Wilson“, а за приликата избра блескава креација која ѝ ја истакна фигурата. Фустанот е дел од колекцијата висока мода за сезоната есен/зима 2024 на либанскиот моден волшебник, Ели Сааб.
И 6-годишниот Сантијаго изгледаше модерно во светлосина кошула, сако и кратки тегет панталони. На црвениот тепих, слаткото момче позираше прегрнувајќи ја својата мајка.
Овој престижен настан, кој за првпат се одржа во Швајцарија, собра бројни познати личности и филантропи, со цел да се поддржат важни хуманитарни проекти. Целта беше да се соберат средства за Фондацијата „Global Gift“ која има позитивен импакт врз животите на деца, жени и семејства кои имаат потреба од помош, ставајќи акцент на родова еднаквост, образование и професионален развој.
